ភ្នំពេញ៖ អគ្គនាយកគយនិងរដ្ឋាករ លោក គន់ ញឹម បញ្ជាក់ថានឹងពុំមានការបន្ថូរបន្ថយទុកពេលឱ្យចូលមកបង់ពន្ធសម្រាប់ម៉ូតូធំដូចរថយន្តនោះទេ តែលើកទឹកចិត្តឱ្យចូលមកប្រកាសពន្ធ។ លោកថា ការនៅតែរឹងទទឹងមិនចូលបង់ពន្ធពេលមន្ត្រីអនុវត្តន៍ចាប់បានម្ចាស់ម៉ូតូនឹងត្រូវបង់ពិន័យធ្ងន់ធ្ងរ។

ថ្លែងក្នុងសន្និសីទសារព័ត៌មានស្ដីពី លទ្ធផលបិទបញ្ចប់ការងារប្រមូលពន្ធអាករលើរថយន្តគ្មានពន្ធមានស្រាប់ក្នុងប្រទេស ល្ងាចថ្ងៃទី១២ ខែមករា ឆ្នាំ២០២៣ លោក គន់ ញឹម បញ្ជាក់ថា ក្រោយពីបើកយុទ្ធនាការមួយរកឃើញម៉ូតូធំអត់ពន្ធដល់ទៅ ១៥០គ្រឿង អគ្គនាយកដ្ឋានបានរកឃើញចំនុចមួយចំនួនដែលធ្វើឱ្យម៉ូតូធំអត់ពន្ធអាចចូលមកកម្ពុជាបានគឺ តាមរយៈការនាំចូលគេចពន្ធពីប្រទេសជិតខាង និងការលួចបន្លំដាក់តាមទូរកុងតឺន័រ។

លោកបញ្ជាក់ថាចាប់ពីពេលនេះក្រៅពីពង្រឹងពិនិត្យតាមព្រំដែន គយនឹងបង្កើនការងារពិនិត្យលើទូរកុងតឺន័រទាំងអស់ដើម្បីបញ្ជាក់ថាគ្មានម៉ូតូគេចពន្ធណាមួយអាចនាំចូលបាន។

សម្រាប់ម៉ូតូគេចពន្ធដែលកំពុងចរាចរណ៍ ឬមាននៅកម្ពុជា លោក គន់ ញឹម បានលើកទឹកចិត្តឱ្យចូលមកប្រកាសពន្ធ ខណៈព្រមានថាបើកម្លាំងចាប់បានប្រាក់ពិន័យអាចធ្ងន់ធ្ងរ។

លោកថា៖ «ម៉ូតូដែលមានស្រាប់ហើយកំពុងកាន់កាប់ដោយបុគ្គលផ្សេងៗហើយចង់មកបង់ពន្ធអាចមកបង់ពន្ធបានតែត្រូវពិន័យ ពិន័យហ្នឹងគឺវាធូរជាងការពិន័យដែលយើងបង្ក្រាបបាន»។

បើតាមលោក គន់ ញឹម ម្ចាស់ម៉ូតូធំមួយចំនួនមានលុយទិញម៉ូតូធំទំនើបតែបែរជាជិះដោយពុំបានបង់ពន្ធទៅវិញ។

លោកថា៖ «ម៉ូតូទំនើប តម្លៃខ្ពស់ ពន្ធខ្ពស់ ពិន័យក៏បង់ឱ្យច្រើនបន្ដិចទៅ! ព្រោះអ្នកមានលទ្ធភាព»៕